IGP SIRRO AWATAKA WANANCHI MKOANI NJOMBE KUKOMESHA MAUAJI YA KISHIRIKINA

 IGP Sirro akiwasili uwanja wa Ndege mkoani Njombe kwaajili ya ziara ya Kikazi

 IGP Sirro akikagua Gwaride mkoani Njombe

MKUU wa jeshi la polisi nchini,IGP Sirro amewataka wananchi mkoani Njombe kubadilika mara moja na kuacha mauaji ya imani za kishirikina na ubakaji katika mkoa huo, kwani mambo hayo hivi sasa yamepitwa na wakati, na hivyo sheria kali zitachukuliwa dhidi ya wahusika kwa kuwa jeshi la polisi limejipanga kudhibiti suala hilo.

“Nimeangalia uharifu mkoani Njombe upo chini, tatizo kubwa nimeona ni mauaji yanayotokana na ushirikina, haya mauaji yanaonekana ni mengi, lakini pia masuala ya kubaka, sambamba na kukamata watu wanaofanya haya mauaji kazi kubwa tunayoifanya ni kutoa elimu,” alisema IGP Sirro.

Alisema wananchi waelewe mambo ya ushirikina kwa sasa haya tija, hivyo watu wanaofanya mauaji kwa ushirikina wengi wamekamatwa, na wamepelekwa mahakamani huku wakiacha familia zao.

 “Wito wangu katika hilo, watanzania na wana Njombe tubadilike, haya mambo ya ushirikina yalishapitwa na wakati, ni mambo ya kishamba, tuna kazi ya kutoa elimu hiyo na nimeelekeza, kamanda na timu yake wajipange vizuri kwenda kwenye baadhi ya vyombo vya habari kuzungumzia suala hilo,” alisema IGP Sirro.

Alisema suala kubwa ni kutoa elimu kwanza, hivyo akatoa wito kwa viongozi wa dini nchini kuendelea kutoa elimu kwa mara nyingi watu wanaofanya ushirikina hawana dini, na hata kama atakuwa na dini, basi atakuwa nayo ya kuhatish

Aidha kwa hatua nyingine IGP Simon Sirro amewataka Wabunge na wanasiasa kuacha kuhoji utendaji kazi wa jeshi hilo, na badala yake amewaasa wananchi kuendelea kusaidia kutoa ushirikiano ili kufanikisha kuwakamata wahusika.

 Akizungumza mara baada ya kukagua gwaride hilo, IGP Sirro aliwashangaa wanasiasa hususan wabunge akiwemo Mbunge wa Rombo, Joseph Selasin kuikosoa kauli yake aliyoitoa akiwa mkoani Mtwara juu ya Dereva wa Mbunge wa Singida Mashariki Tundu Lissu kushindwa kuitikia wito wa kuitwa kuhojiwa na jeshi la polisi ili kutoa ushirikiano wa upelelezi unaohusiana na tukio la kushambuliwa Lissu mkoani Dodoma, alisema badala ya kufanya kazi zao kama wanasiasa hivi sasa wamegeuka kutaka kuanza kukamata watuhumiwa

“Uharifu kama tumeshindwa kuuzuia kama ulivyotokea, tutahakikisha kwamba kwa kupata taarifa za wananchi, tunawakamata wahusika,” alisema IGP Sirro.

“Lakini huyo kijana wao wanayesema tuanze kupeleleza huku, sasa wanatufundisha kazi, nimeona mbunge mmoja anakaa anasema sijui namna gani, kwa nini wasianze hivi, naye tumwachie aseme, maana yake ukishakuwa na mdomo ni lazima aseme, kwa hiyo kimsingi sisi ni professional, tunajua tunachofanya, hii kazi tumeisomea,” alisisitiza IGP Sirro.

Mkuu huyo wa Jeshi la Polisi nchini alisema hayo jana mara baada ya kufanya ziara ya siku moja mkoani Njombe alipotembelea makao makuu ya jeshi la Polisi mkoani hapa na kukagua gwaride rasmi lililoandaliwa na askari polisi wa jeshi hilo.

 “Sasa wanasiasa nao wamekuwa wapolisi nao wanataka kukamata, wanataka kupeleleza, sasa jamani kazi ya ubunge imewashinda, mnataka kuwa polisi officer, kwa hiyo watuachie kazi ya polisi tuifanye kama jeshi la polisi,mambo mengine  watuachie sisi, tunachotaka kwao ni taarifa,” alisema IGP Sirro.

Alisema suala la kuhoji kazi za jeshi hilo, ina maana wanavaa viatu vyake, na pia hawajui jarada la upelelezi limefika wapi.

“Lakini waelewe kwamba wanafanya siasa kwa sababu kuna amani na utulivu, tungekuwa tunafanya sisi mambo ya siasa uharifu ungekuwa mkubwa sana hapa nchini, wala hiyo siasa wasingeifanya, ni waachie wabunge waseme kwa sababu ni wajibu wao wanapata posho kwa sababu ya kusema,” alisema.

Mwisho