MANGULA AMWAGIA SIFA FILIKUNJOMBE KWA KUTEKELEZA MIKAKATI YA CCM

Makamu mwenyekiti wa CCM Tanzania bara Bw.Philipo Mangula amemwagia sifa mbunge wa jimbo la Ludewa mh.Deo Filikunjombe kwa kuanza kutekeleza mipango mikakati ya chama cha mapinduzi ambayo ililenga kutoa mafunzo kwa viongozi wa chama hicho katika ngazi ya kata,vijiji na matawi ili kukiboresha chama katika utendaji.

Kauli hiyo ilitolewa hivi karibuni na Bw.Mangula makao makuu ccm Dodoma alipotembelewa na mh.Filikunjombe akiwa na viongozi wa ccm 92 kutoka wilayani Ludewa ambao walisafirishwa na Mbunge wao kwalengo la kupata mafunzo mbalimbali yahusuyo chama cha mapinduzi.

Bw.Mangula alisema Filikunjombe amefanya kazi ambayo chama katika mipango yake kilipanga kufanya hivyo ni mbunge wa mfano kwa chama kwani anafanya kazi ambayo italeta manufaa makakubwa kwa chama hasa katika kipindi hiki kinachokaribia uchaguzi wa Serikali za mitaa.

“Hongereni wanaccm wilaya ya Ludewa kwani mmekuwa mfano wa kuigwa kwa wilaya nyingine nchini kupitia mbunge wenu,hali hii si ya kawaida kutokana na ukweli kwamba chama katika malengo yake tumesisitiza kila wilaya kufanya mafunzo kwa viongozi wa kada zote ili kuweza kujihakikishia ushindi mwaka 2015 lakini nampokeza mbunge wenu Filikunjombe kwa kuanza na utekelezaji wa agizo hilo na naomba wengine waige jambo hili”,alisema Bw.Mangula.

Aidha mwenyekiti wa CCM mkoa wa Njombe Mh.Deo Sanga(Jaa people) amemuunga mkono Filikunjombe kwa kazi hiyo ya chama ambapo alisema haijawahi tokea kuona mbunge akawasafirisha viongozi wa chama chake kwa wingi kiasi hicho hadi Bungeni kwaajili ya mafunzo hivyo huo ni ukomavu wa siasa na ni lengo zuri la kukiboresha chama hasa katika ngazi za chini.

Mh.Sanga Jaa people alisema amejifunza kitu kutoka kwa Filikunjombe hivyo hata yeye anapaswa kufanya hivyo ili kuhakikisha chama cha mapinduzi katika jimbo lake kinasimama imara kwani viongozi walio wengi katika ngazi za wilaya na kata hata vijiji bado wanahitaji elimu ya kutosha katika kusimamia majukumu yao ya kila siku.

Alisema katika maeneo mbalimbali kumekuwa na tabia ya baadhi ya wabunge kufanya mambo hayo katika ngazi ya wilaya na kuwasafirisha Madiwani katika kujifunza mambo mbalimbali lakini Filikunjombe ameanza na viongozi wote wa kata za wilaya ya Ludewa hivyo ni mfano wa kuigwa kwa wabunge wengine wa chama cha mapinduzi hasa ndani ya mkoa wa Njombe.

“kwa kweli Filikunjombe amenifundisha kitu mimi na wenzangu,hata siku moja sikuweza kufikilia kufanya jambo kubwa kama hili na hakuna atakaye beza jambo jema ndani ya ccm kama hili,ninachowaomba wajumbe mkaitumie elimu hii mlio ipata kwa mbunge wenu ametumia fedha nyingi katika kuwasafirisha na kuwahudumia mpaka mnaporudi hivyo msimuangushe yeye na chama cha mapinduzi katika utekelezaji”, alisema Mh.Sanga Jaa people.

Wajumbe hao kutoka wilaya ya Ludewa ambao ni wenyeviti wa ccm kata,makatibu kata na makatibu uenezi na itikadi wa kata walifanya ziara hiyo ya mafunzo mjini Dodoma ambapo walipata fulsa ya kuhudhuria kikao cha bajeti hasa kipindi cha maswali na majibu katika Bunge la Jamuhuri ya Muungano wa Tanzania.