MWANAFUNZI ALIYEFANYIWA UKATILI APEWA MSAADA WA BAISKEL KWA AJILI YA KUENDEA SHULE

 Mtoto Frola Nsubili katikati akipokea msaada wa baiskeli

 

Na Ibrahim  Yassin,Kyela

SHIRIKA la The Struggle for Community Support Alliance (SCSA) yenye makao makuu yake wilayani Kyela mkoani Mbeya limetoa baiskeli moja aina ya kamongo yenye thamani ya shilingi 120,000 kwa mtoto yatima aliyefanyiwa ukatili Frola Nsubili (13) mkazi wa kitongoji cha Mbasi kijiji cha Lugombo Kata ya Mwaya wilayani hapa.

Akizungumza mara baada ya kukabidhi msaada huo Naibu Katibu mkuu wa shirika hili Taifa Alfred Mwansasu alisema kuwa walisikia tanzgazo la uwepo wa tatizo la yatima huyo kwenye kituo cha redio Kyela nayeye kama Katibu aliwasiliana na mwenyekiti wa shirika hilo kitaifa aliyekuwa Korea kusini kikazi ambaye alituma pesa hizo kwa ajili ya ununuzi wa baiskeli hiyo pamoja na mambo mengine.

Akizungumza kwa njia ya simu kutoka korea kusini mwenyekiti mtendaji wa shirika hilo kitaifa Abraham Mwanyamaki alisema shirika lake limetoa msaada huo ili kumuwezesha mwanafunzi huyo kwenda shule kirahisi na kwamba wataendelea kutoa misaada kama hiyo pale watakapo hitajika kufanya hivyo.

Alisema pindi atakaporejea nchini ataitembelea familia hiyo ili kujua matatizo mengine yanayo ikabili familia hiyo na kuyatatua ikiwa ni pamoja na kutengeneza na kuboresha makazi  ya familia hiyo ili kuiwezesha kupata furaha na kuwaondolea hudhuni waliyonayo.

Msichana huyo ambaye hana wazazi wote wawili na anaishi na Bibi yake ambaye ni mremavu alihitimu darasa la saba mwaka jana na kuchaguliwa kujiunga na masomo ya kidato cha kwanza mwaka huu katika shule ya mwaya ambapo bibi yake alikusanya fedha kidogo kutoka katika shughuri zake zan kilimo kwa ajili ya kumlipia karo lakini kuna kikundi kilichodaiwa kuwa kimepewa mamlaka na halmashauri kuwalipisha watu wanaolima kando ya ziwa nyasa.

Akizungumza kwa masikitika mtoto huyo alidai kuwa bibi yake ni mmoja kati ya wanaolima kando ya ziwa hili kwa muda wa zaidi ya miaka 50 na kuwa alishangazwa kikundi hicho kuharibu mazao yao ambayo yalistawi vizuri bila hata kupewa taarifa ya kuwepo kwa utaratibu huo wa kukataza huku wakiwatoza faini ya 50,000 kila mkulima kitu ambacho ni kinyume na taratibu.

Alisema Bibi yake alikuwa amekusanya fedha Tsh,30,000 akiwa na lengo la kulipa mahitaji ya shule lakini watu hao walizichukuwa wakidai kuwa ni faini kitu ambacho kilipelekea yeye kushindwa kujiunga na masomo hadi pale waandishi wa habari walipokuja na kuibua utata huo ikiwa ni pamoja na kumuombea misaada kwa watu mbalimbali ambao waliweza kumsaidia na kumuwezesha kwenda shule.

Mwenyekiti wa halmashauri hiyo ambaye pia ni diwani wa Kata ya Kyela mjini kwa upande wake alisikitishwa na kitendo kilichofanywa na kikundi hicho cha kuwafanyia ukatili wanakijiji hao kwa kuatoza faini na kuharibu mazao yao kwa madai kuwa walitumwa na halmashauri kitu ambacho si kweli.

Aliesema kuwa yeye kama mwenyekiti hanataarifa na uwepo wa mpango huo uliopelekea baadhi ya watu kuyahama makazi yao kwa kukosa pesa za kulipa faini huku familia zao zikipata taabu na kwamba suala hilo atalifanyia kazi na kuwashughulikia wale wote walioendesha opereshen hiyo.

Katika hatua nyingine Shirika hili linatarajia kufunga mitambo miwili ya kuzalisha Gesi asilia(BIO GAS) mwisho wa mwezi huu katika kata ya Ipande Tarafa ya Ntebela na Kasumulu Tarafa ya Unyakyusa kwa ufadhiri wa wakala wa nishati vijijini (REA) na Shirika lenyewe mradi ambao utapunguza baadhi ya changamoto kwa wananchi.

Mwisho.