wajumbe wa serikali ya kijiji wakitoka katika mkutano wa kujadili namna huduma hiyo inavyotolewa
Vijana watatu katika kijiji cha Ludende kata ya Ludende
wilayani Ludewa katika mkoa wa Njombe wameungana kwa pamoja ili kuweza
kuboresha huduma ya umeme waliyokuwa wakiitoa katika kijiji cha Ludende.
Vijana hao ambao walianza kutoa huduma hiyo mwaka 2009 wakiwa
tofauti kwa kila mmoja kuzalisha umeme wake na kusambaza katika mtaa ambao yeye
anaishi ambapo waliweza kuzifikia nyumba 69 wameamua kwa dhati kuungana na
kusambambaza umeme huo katika kata nzima ya Ludende.
Akizungumza na mwandishi wa habari hii Bw.Agustino Msigwa
ambaye ni mmoja wa vijana hao alisema kuwa huduma hiyo ilianza kutolewa mwaka
2009 kupitia mto Vombwe lakini yeye pekeyake aliweza kusambaza umeme huo katika
nyumba 21.
Bw.Msigwa alisema wao hawajasomea masuala ya umeme lakini
kupitia vipaji walivyojaliwa na Mwenyezi Mungu waliweza kufanya ubunifu ambao
uliwasaidia kufikia malengo yao ya kuzalisha nishati ya umeme ikiwa kila mmoja
alizalisha katika eneo lake.
“mimi na wenzangu ambao ni Bw.Nicky Komba na Francis Mwinuka
kila mmoja kwa muda wake tumeweza kutoa huduma hiyo lakini tunapata wasiwasi
baada ya kutokea watu wengine kutueleza tuache kuyatumia maji ya mto huo eti
kwakua hatujafuata hatua za kisheria baada ya kupata habari kuwa tumeungana ili
tuweze kusambaza kata nzima”,alisema Bw.Msigwa.
Naye Bw.Nicky Komba mmoja wa vijana hao alilaani kitendo cha
watu wasiojulikana kuuingilia mto huo kwa kuwataka wasitishe huduma yao kwa kua
hawana elimu ya kutosha kukutana na mamlaka husika.
Bw.Komba alisema wao wameshafikia hatua nzuri katika umeme
wao na wamekubaliana kuungana ili kuipanua huduma hiyo lakini hawana utaalamu
wa kutosha hivyo wanaziomba mamlaka husika na wafadhiri mbalimbali kuwasaidia
ili kufikisha huduma hiyo kwa wananchi wengi zaidi.
Alisema wamepata taarifa kuwa tayari kuna watu wameshaulipia
mto huo katika mamlaka ya bonde la ziwa Nyasa na REA ambapo wao hawazijui ofisi
za mamlaka hizo kutokana na kutokuwa na uelewa wakutosha hivyo wanawaomba
watanzania wanaozijua ofisi hizo ili waweze kuiendeleza huduma hiyo.
Aidha mmoja wa wananchi wa kijiji cha Ludende Bw.Vasco Msigwa
alikili kuwepo umuhimu wa huduma inayotolewa na vijana hao kwani ni miaka mine
mpaka sasa huduma ya umeme inapatikana katika kijiji chao bila matatizo yoyote.
Bw.Vasco alisema kuungana kwa vijana hao kutaleta maendeleo
makubwa kwa awali kijiji hicho hakikuwa na nishati hiyo hivyo wananchi
walilazimika kutembea zaidi ya kilometa 20 kufuata hutuma ya umeme kwaajili ya
kuchaji simu zao.
Alisema kwa sasa maendeleo yameibuka ghafra kutokana na
huduma hiyo ya umeme hapo kijijini na kitu cha msingi ni kuwaunga mkono vijana
hao na si kuwazuia kwa lengo la watu wengine kujinufaisha kwa vijana hao ni
ukombozi mkubwa wa kjiji na kata ya Ludende.
Mwenyekiti wa kijiji cha Ludende Bw.Samwel Shagama alisema
mchango wa vijana hao katika maendeleo ya jiji cha Ludende ni mkubwa hivyo
hawapaswi kubughuziwa zaidi ya kuwapa nguvu ili waweze kujiboresha zaidi.
Bw.Shagama alikiri kuwepo kwa wadau wengine ambao si wazawa
wa kijiji hicho ambao walisema wanavibari vya mamlaka ya bonde la ziwa Nyasa na
wakala wa umeme vujijini REA katika kuutumia mto Vombwe kwaajili ya kuzalisha
umeme na kuusambaza ndani ya kata hiyo.
“wamekuja wakisema wanavibari lakini vijana hawa wameanza
kutoa huduma hiyo muda mrefu hapa kijijini hivyo kitu cha msingi ni kwama
mamlaka hizo zifike hapa na zione namna ya kuendelea kuwasaidia vijana hawa na
si kuwazuia”,alisema Bw.Shagama.
Bw.Shagama aliwataka vijana hao kuendelea na muungano wao kwa
kutekeleza ilani ya Chama Cha Mapinduzi kwa kuwahudumia wananchi walioko
vijijini ili kuendelea kukuza maendeleo ambayo kila mwananchi ananufaika nayo.
Mwisho.
No comments:
Post a Comment