FILIKUNJOMBE AWAHAKIKISHIA WANANCHI WAKE UJENZI WA CHUO CHA VETA KUANZA JULAI MWAKA HUU.

 

Mbunge wa jimbo la Ludewa Bw.Deo Filikunjombe amewahakikishia wananchi wake kuwa na matumaini ya ujenzi wa chuo cha VETA kuanzia julai mwaka huu katika kijiji cha shaurimoyo kata ya Lugarawa ili kwenda sambamba na migodi inayotarajia kuanzishwa.

Akizungumza katika mkutano wa hadhara katika kijiji cha Shaurimoyo Filikunjombe alisema Serikali imeamua kufanya ujenzi huo kutokana na umuhimu wa wilaya hiyo na migodi inayoendelea ili kupata wataalamu watakaofanya kazi katika migodi hiyo.

Alisema ni fulsa pekee kwa wananchi wa wilaya ya Ludewa kuchangamkia elimu itakayotolewa na chuo hicho ili kuweza kuajiliwa na wawekezaji pia kujiajili katika mambo mbalimbali ndani na nje ya wilaya hiyo.

Bw.Filikunjombe alisema ujenzi wa chuo cha VETA wilaya ya Ludewa umekuwa ukipigwa danadana kwa muda mrefu bila mafanikio lakini kwasasa umefika wakati hata kama Serikali haina pesa za kutosha kujenga chuo hicho wananchi wako tayari kujitolea nguvu zao ili chuo hicho Kijengwe.

“Mimi na wananchi wangu tuko tayari kujitolea nguvu zetu ili chuo hiki kijengwe kwani ni ukombozi mkubwa kwa wilaya yangu kutokana na wilaya hii kutokuwa na chuo cha ufundi tangia wilaya ianzishwe na tunaamini vijana wa wilaya hii wanauwezo mkubwa kiakili katika kusoma fani mbalimbali zitakozofundishwa hapa chuoni”,alisema Filikunjombe.

Alisema kutokana na uanzishwaji wa miradi mikubwa ya uchimbaji wa chuma cha Liganga na Makaa yam awe ya Nchuchuma imepelekea chuo hicho kujengwa kwa haraka ili wahitimu wa fani mbalimbali kuajiliwa  katika migodi hiyo.

Aidha aliwataka wananchi wa wilaya ya Ludewa hususani kijiji cha Shaurimoyo ambako ndiko chuo cha VETA kitajengwa kuwaandaa vijana wao ili waweze kusoma katika chuo hicho kwani wasipo fanya hivyo watabaki kuwa watazamaji kwa watu wengine watakaokuja kusoma.

Mkurugenzi mkuu wa VETA Tanzania Bw.Zebadia Moshi aliwahakikishia wananchi hao kuwa Julai mwaka huu chuo hicho kitaanza ujenzi rasmi na ifikapo Julai mwakani masomo yanatakiwa kuanza kutolewa rasmi ili kwenda sambamba na uanzishaji wa migodi inayokuja.

Bw.Moshi alimsifu mbunge wa Ludewa Bw.Filikunjombe kwa ufuatiliaji wake mpaka chuo hicho kujengwa wilayani Ludewa kwani chuo hicho hakikupaswa kujengwa mwaka huu kutokana na ufinyu wa bajeti katika ofisi yake.

Alisema katika takwimu zake kwa mwaka 2013 ilitakiwa vijengwe vyuo vine na si wilayani Ludewa lakini kutokana na umakini wa mbunge wa jimbo hilo vimeongezwa vyuo viwili kikiwemo chuo cha Ludewa hivyo wananchi wanatakiwa kumshukuru mbunge wao.

“katika ofisi yangu sikuwa na ratiba ya kujenga chuo mwaka huu ndani ya wilaya ya Ludewa lakini kwa usumbufu wa Mbunge wenukwa waziri anayesimamia wizara husika imebidi Ludewa ipate nafasi ya ujenzi wa chuo tena haraka “,alisema Bw.Moshi.

Bw.Moshi aliwataka wananchi kujitolea nguvu zao ili chuo hicho kijengwe kwa muda muafaka kwani kwa kufanya hivyo kinaweza kuleta manufaa mapema zaidi kwa wananchi tofauti na watu wa maeneo mengine wanavyofikiri.

MWISHO