WASANII LUDEWA WATAKIWA KUWA NA UMOJA

msanii Steven Mapunda akifanya mahojiano katika studio za Radio Best Fm Ludewa kuhusu Ludewa Talents Program

 Katibu wa mbunge wa jimbo la Ludewa Bw.Fungatwende akifungua mafunzo hayo katika ukumbi wa ccm wilaya ya Ludewa.

 Viongozi wa vikundi mbalimbali vya sanaa kutoka vijiji vya wilaya ya Ludewa wakifuatilia mafunzo hayo

  Viongozi wa vikundi mbalimbali vya sanaa kutoka vijiji vya wilaya ya Ludewa wakifuatilia mafunzo hayo

 Viongozi wa vikundi mbalimbali vya sanaa kutoka vijiji vya wilaya ya Ludewa wakifuatilia mafunzo hayo

Steven Mapunda akitoa somo katika mafunzo hayo kwa viongozi wa wasanii wilayani Ludewa.

Wasanii wilayani Ludewa wametakiwa kuwa na umoja ili kukuza sanaa yao ambayo itaitangaza wilaya ya Ludewa na Taifa kwa ujumla kwani wilaya ya Ludea inahazina kubwa ya vipaji zikiwemo ngoma za asili ambazo hazipatikani maeneo mengine nchini.

Hayo yamesemwa na Mbunge wa wilaya ya Ludewa Mh.Deo Ngalawa kupitia katibu wake Bw.Fotunartus Fungatwende hivi karibuni katika mafunzo ya siku moja yaliyofanyika katika ukumbi wa chama cha mapinduzi Ludewa yaliyoandaliwa na Ludewa Talent Program na kuratibiwa na Ludewa Youth Talents.

Akifungua mafunzo hayo Bw.Fungatwende kwa niaba ya Mbunge ambaye alialikwa kuwa mgeni rasmi katika mafunzo hayo ya kujengewa uwezo alisema kuwa wilaya ya Ludewa inahazina kubwa ya vipaji vya wasanii lakini vipaji hivyo vinashindwa kuonekana kutokana na kutokuwa na umoja wa wasanii.

Alisema watu wa maeneo mengine wamekuwa wanahamu ya kuona tamaduni za wanaludewa lakini hawapati fulasa hiyo kutokana na baadhi ya wasanii waliofanikiwa kuwa wabinafsi kwa kushindwa kuwainua wengine ili waweze kuitangaza wilaya yao.

“vijana kwa wazee kunafulsa kubwa ya kujikwamua kiuchumi kupitia sanaa zenu lakini kuna baadhi ya watu wakishafanikiwa husahau nyumbani,mimi nimshukuru Steven Mapunda kupitia Ludewa Talent Program na kwa kushirikiana na kikundi cha sanaa cha Ludewa Youth Talents kwa kufanya mafunzo haya ambayo yameweza kuwakutanisha wasanii wa sanaa mbalimbali kutoka vijiji vya Ludewa na kwa kufanya hivi umoja unaweza kupatikana”,alisema Bw.Fungatwende.

Bw.Fungatwende alisema kuwa Steven Mapunda ni msanii mkubwa wa Bongo Muvi lakini richa ya kuwa tayari ameshafanikiwa aliona si vyema akabaki na ujuzi huo Jijini Dar akaona arudi nyumbani na kuongea na wasanii wengine ili nao siku moja wafanikiwe kama yeye.

Alisema kuwa kwa kuonesha umoja huo na nia ya kutengeneza Filamu ya pamoja na ngoma za asili ambayo itaendelea kitambulisha wilaya ya Ludewa Mh. Ngalawa atawaunga mkono kwa asilimia mia ili kuhakikisha umoja huo unaendelea kudumu na kuinua sanaa zote za nyumbani zinawanufaisha wasanii.

Aidha msanii Steve Mapunda mwenyekiti wa Ludewa Talent Program ambaye alitokea jijini Dar es Salaam ambaye ni mzaliwa wa wilaya ya Ludewa akitoa mafunzo hayo ya kuwajengea uwezo wasanii wa wilaya ya Ludewa alisema kuwa aliona sio busara kukaana ujuzi huo mjini bali jambo la msingi ni kugawana na wasanii wa nyumbani bila kujali kila mmoja anafanya sanaa ipi.

Bw.Mapunda alisema kuwa inauma sana kuona kunawasanii wakubwa wa kutoka wilaya ya Ludewa wamefanikiwa lakini hawarudi nyumbani kuwainua na wenzao kwani mfano mzuri ni wasanii wa Kigoma wamekuwa wakisaidiana na kufanya kazi ya pamoja na kuutangaza mkoa wao.

Alisema kuwa tayari mpango wa kurekodi ngoma za asili na kuziuza umekamilika pia mpango wa kurekodi Filamu yenye mahadhi ya wilaya ya Ludewa unaendelea kukamilika kwani unatarajia kugharimu kiasi cha shilingi milioni saba na nusu hivyo mchakato wa kuomba wadau mbalimbali ili kufanikisha kazi hiyo unaendelea.

Naye Mwenyekiti wa Ludewa Youth Talents Bw.Nasibu Luoga aliwataka wasanii wa wilaya ya Ludewa kupitia vikundi vyao au msanii mmoja mmoja kujisajiri katika baraza la sanaa la Taifa kama kikundi chake kilivyosajiriwa kwani kwa kufanya hivyo uwezo wa kupata mikopo ya vikundi ili kuendeleza sanaa itawezekana.

Bw.Luoga alisema kuwa kikundi cha Ludewa Youth Talents baada ya kusajiriwa kimenufaika na mambo mengi yakiwemo mafunzo mbalimbali yanayotolewa katika kazi ya wilaya,Mkoa hadi Taifa hivyo vikundi vya ngoma za asili na sanaa kwa ujumla vinatakiwa kusajiriwa ili viweze kutambuliwa na Serikali.

Mwisho.