SERIKALI YAKWAMISHA KUENDELEA KWA MIGODI WA LIGANGA NA MCHUCHUMA.

                  

KAMPUNI ya Tanzania China International Minerals Resouces Limited iliyoundwa na ubia kati ya Tanzania na china inashindwa kuanza machimbo ya makaa ya mawe ya mchuchuma na chuma cha Liganga kutokana na serikali kushindwa kutimiza masharti yaliyomo ndani ya mkataba imefahamika.

HUANG DAXIONG afisa mtendaji wa kampuni alizungumza hayo jana katika kambi ya machimbo ya makaa ya mawe Mchuchuma alisema kazi waliyoitarajia kuifanya inaendelea lakini wanakumbana na changamoto ambazo mtatuzi ni Serikali ya Jamuhuri ya Tanzania.

Bw.Daxiong aliyataja makubaliano ya kampuni yake na Serikali ni pamoja na upanuzi wa barabara kuu kutoka Njombe hadi Nkomang’ombe ambako ndiko kwenye makaa ya mawe.

Alisema wanashindwa kupitisha mitambo ya kufanyia kazi kutokana na barabara hiyo kuwa nyembamba na madaraja mdogo ambapo ni vigumu kupitisha gari zenye tani kubwa katika barabara ya wilaya ya Ludewa.

“makubaliano yetu na Serikali ilikuwa ni upanuzi wa barabara haraka iwezekanavyo ili tuweze kufanya kazi ambayo inategemea zaidi kusafirisha mitambo kutoka bandari ya Dar es salaam hadi migodini lakini sisi tumeshaanza kazi Serikali ya Tanzania bado”,alisema Daxiong.

Aidha alizitaja changamoto nyingine ni pamoja na urasimu ulioko bandari ya Dar es Salaam katika kuchukua mitambo yao inayotoka nchini China na ucheleweshaji wa vibari vya kufanyia kazi.

Bw.Daxiong alisema urasimu huo ulioko Bandarini pamoja na ucheleweshaji wa vibari umekuwa changamoto kubwa kwao kwani mitambo mingi bado iko bandarini na haijulikani hatma ya tatizo hilo kwani muda unazidi kwenda bila mafanikio.

Alisema suala la vibari lilianza kushughurikiwa kabla ya kusaini mkataba lakini kumekuwa na urasimu mkubwa ambao unawakatisha tama wawekezaji hao katika kuifanya kazi hiyo ya uanzishaji wa mgodi kwa wakati muafaka kama walivyotarajia.

Bw.Daxiong alimuomba mbunge wa jimbo la Ludewa Bw.Deo Filikunjombe kujaribu kuishawishi Serikali ili kuharakisha vibari vya kazi,upanuzi wa barabara na kuondoa urasimu bandarini ili waweze kuondoa mizingo yao haraka pindi inapofika bandarini hapo.

Nae Filikunjombe aliahidi kuongea na Serikali ili kuharakisha miradi hiyo ambayo ni miradi mikumbwa nchini kwani umeme utakozalishwa mchuchuma utatumika nchi nzima na ndio suruhisho la tatizo la umeme nchini.

Filikunjombe aliitaka kampuni hiyo kutokatishwa tama na mambo hayo kwani Serikali inayoongozwa na rais Dr.Jakaya Mrisho Kikwete iko makini ila kuna watu wachache ndio tatizo ambao hawana maisha marefu ndani ya Serikali hiyo.

Bw.Filikunjombe aliwataka wananchi waishio katika maeneo ya migodi kuwapa ushirikiano wawekezaji ili waweze kuiona Tanzania ni nchi yenye maziwa na asali na wananchi wake ni wakalimu kama tamaduni za mtanzania zilivyo.

Mwisho.