FILIKUNJOMBE AMUUMBUA MUHANDISI WA MAJI WILAYA YA LUDEWA MBELE YA WANANCHI

 

Mbunge wa jimbo la Ludewa Bw.Deo Filikunjombe alimweka kitimoto kaimu muhandisi wa maji wilaya Bw.Theodory Mfuse mbele ya wananchi wa kijiji cha maholong’wa na kumtaka atamke ni sababu zipi zilizopelekea wananchi wa kijiji hicho licha ya kutoa michango yao mpaka sasa hawana maji safi na salama hali ainayopelekea wananchi hao kuto iamini Serikali yao.

Bw.Filikunjombe alifanya hivyo kutokana na kijiji hicho kilichopo kata ya Ludende kutokuwa na maji kwa muda mrefu licha ya kuwa na fedha za miradi ya maji ambazo zilitengwa kusambaza miundombinu ya maji katika kata hiyo yenye vijiji vitatu lakini fedha hizo zimetumika katika kijiji cha Ludende pekee na kushindwa kufika katika vijiji vingine.

Alisema Serikali haita fumbia macho ubadhilifu unaoonekana wazi wazi kwani ofisi ya maji wilaya ya Ludewa imeshindwa kuwafishia wananchi wa kijiji cha Madindo na Maholong’wa maji safi na salama kutokana na uzembe kwani hata mchoro wa ramani kuonesha wapi miundombinu ya maji itapita limekua tatizo hilo ni tatizo kubwa ndani ya ofisi hiyo.

Bw.Filikunjombe alimuelea Mfuse kuwa wananchi hao wako tayari kutoa nguvu zao katika uchimbaji wa mitaro ya kupitisha mabomba na tayari wana zaidi ya shilingi milioni tatu(3) bank ambazo walichangishana kwaajili ya upatikanaji wa majisafi na salama lakini mamlaka ya maji wilaya ya Ludewa ndio tatizo kubwa katika kuchelewesha utekelezaji.

“mimi nashangaa ni miaka mingi sasa imepita hakuna kinachoendelea mmeweka mabomba mpaka kijiji cha Madindo lakini hakuna maji pia wananchi wa Maholong’wa waliwaomba muwacholee ramani ili watafute mfadhiri kama ninyi mmeshindwa lakini mpaka sasa hakuna hiyo ramani,nataka uwaeleze wananchi katika mkutano huu ni lini mtakamilisha kazi hiyo”,alisema Bw.Filikunjombe.

Alisema mradi huo wa kusambaza maji katika vijiji vitatu vya kata ya Ludende ulikuwa mkubwa na fedha za mradi wa maji zilitoka Bank ya Dunia lakini kuna baadhi ya watu ndani ya sekta hiyo wamefanya ndivyo sivyo hivyo Serikali haitaweza wafumbia macho watu wa namna hiyo kutokana na wananchi wanavyoiamini Serikali yao.

Aidha kaimu mwandisi huyo alipata wakati mgumu mbele ya wananchi katika kulijibia hilo kutokana nay eye ndiye aliyekuwa msimamizi wa ujenzi wa mradi huo uliotakiwa kupeleka maji katika vijiji vitatu na badara yake maji yalifika kijiji kimoja na kijiji kilichofuata kutandikwa bomba zisizo na maji.

Bw.Mfuse alijitetea kwa kusema fedha za ujenzi wa mradi huo zilikuwa zikija kwa awamu hivyo awamu ya kwanza ilikuwa ni ujenzi wa tank ambao ulikamilika,awamu ya pili ilikuwa ni kusambaza miundombinu ya kupitishia maji katika vijiji viwili yaani kijiji cha Ludende na Madindo na awamu ya tatu ilikuwa ni kijiji cha maholongwa lakini fedha hizo hazikuletwa.

Alikili kuwepo na uzembe katika uandaaji wa ramani ambayo iliombwa na uongozi wa kijiji hicho ili kupeleka kwa mfadhiri ambaye aliahidi angeweza kulitatua tatizo la maji katika kijiji hicho hivyo atalifanyia kazi haraka iwezekanavyo ili wananchi waendelee kuwa na imani na Serikali yao.

Nae Diwani wa kata ya Ludende Bw.Frank Luoga Mseya alisema ni miaka mitatu imepita ofisi hiyo ya maji imeshindwa kutekeleza ombi la kijiji hicho la uchoraji wa ramani hali hiyo inaonesha ofisi hiyo inaurasimu kwani kila viongozi wa kijiji wakifika ofisini hapo kufuatilia ramani hupata ahadi zisizotimilika.

“wananchi wanaona kama Serikali inawatenga kwani kjiji kikubwa kama hiki tokea nchi ipate uhuru haijawahi kupata maji safi na salama zaidi ya kuugua homa za matumbo na wengine kupoteza maisha kutokana na kutumia maji yasio salama”,alisema Bw.Frank Luoga Mseya.

Bw.Filikunjombe alisisitiza kuwa kama yeye ni mbunge wa jimbo la Ludewa aliiomba ofisi hiyo impe makisio ya usambazaji maji katika mji wa Ludewa  mpaka sasa ni miezi sita imepita hajapata makisio hayo ni dhahiri wasingeweza kuwapa ramani wananchi wa kijiji cha Maholong’wa.

Hivyo alimtaka kamimu muhandisi huyo kuhakikisha wananchi wa kata hiyo wanahudumuwa ipasavyo na si ahadi kwani wanafedha zao walizochangishana zitakazo wasaidia katika utatuzi wa kero hiyo kwani wako tayari kujitolea nguvu zao katika kufanikisha suala la maji.

Mwisho.