WILAYA YA LUDEWA HAINA CHUMBA CHA KUHIFADHIA MAITI

HOSPITALI ya wilaya ya Ludewa katika Mkoa mpya wa Njombe imo hatarini kupata magonjwa ya mlipuko kutokana na kukosa chumba cha kisasa cha kuhifadhia maiti zaidi ya miaka kumi na tano.

Akizungumza na waandishi wa habari ofisini kwake jana mganga mkuu wa wilaya ya Ludewa DR.Happines Ndossi alisema kuwa Hospitari hiyo ya wilaya inachumba kimoja tu cha kuhifadhia maiti chumba ambacho hakiwezi kukabiliana na kasi ya ongezeko la watu.

 DR.Ndossi alisema kumekuwa na shida kubwa ya uhifadhi maiti kutokana na chuma hicho kutokuwa na majokofu na kuwa na uwezo wa kuhifadhi maiti mbili tu kutokana na ufinyu wa chumba hicho.

Alisema kuwa kutokana na wilaya yake kuwa na watu wanaotoka mikoa na nchi jirani kuhamia imekuwa ni vigumu kuhifadhi maiti zao pindi wanapofariki hali hiyo inawapa shida ndugu na jamaa wa marehemu na kuwapasa kufanya mipango ya kusafirisha haraka.

“Tuna changamoto kubwa kwa wananchi wa Ludewa hasa wazee ambao watoto wao wanafanya kazi mikoa mingine kwani wazee hao wakifariki hatuna uwezo wa kuitunza miili yao ili kuwasubiri watoto wao kwa mazishi kutokana na ukosefu wa majokofu na vyumba vya kutosha kuhifadhia maiti”,alisema DR.Ndossi.

DR.Ndossi alisema kunahatari zaidi kutokana na wilaya hiyo kuwa na wawekezaji wa nchi mbalimbali katika migodi ya makaa yamawe mchuchuma na chuma liganga kwa kuwa na chumba cha kuhifadhia maiti kisicho na sifa.

Alisema chumba hicho kilijengwa tangia wilaya hiyo inaanzishwa kwa takwimu za watu wa kipindi hicho lakini kwa sasa inahitajika nguvu ya ziada ya kujenga nyumba kubwa ya kuhifadhia maiti.

Hata hivyo alisema ofisi yake imeshaandika Bajeti ya ujenzi wa nyumba hiyo na kuiwasilisha ngazi husika kinachosubiriwa ni utekelezaji tu wa pendekezo hilo.

Aidha alisema licha ya kutokuwa na chumba cha kuhifadhia maiti pia wilaya yake inakabiliwa na upungufu mkubwa wa wafanyakazi kwani waliopo hawazidi 50% jambo ambalo ni kero kwa wananchi.

Alisema kuwa kumekuwa na vituo vya afya na zahanati zenye mfanyakazi mmoja na nyingine kukosa kabisa hivyo kushindwa kukidhi mahitaji ya wananchi ambao hujitolea kuzijenga zahanati hizo wakiwa na lengo la kuhudumiwa ipasavyo.

Ili kupunguza tatizo hilo DR.Ndossi anaiomba Serikali kuiangalia wilaya hilo kwa jicho la huruma kwa kuipelekea wafanyakazi kwani wilaya hiyo ni kubwa na ina zahanati 47,vituo vya afya 6 na Hospitari 3 zisizo na wafanyakazi wakutosha.