KIJANA AHUKUMIWA VIBOKO 12 KWA KUBAKA

                     

MAHAKAMA ya hakimu mkazi Wilaya ya Ludewa katika mkoa wa Njombe mbele ya hakimu Fredrick Lukuna imemtia hatiani na kumhukumu kijana mmoja kuchapwa viboko 12 kwa kumbaka mtoto wa kike mwenye umri wa miaka 11 na kumsababishia maumivu makali mwilini.

Awali ilidaiwa mahakamani hapo na mwendesha mashtaka wa polisi mkaguzi wa polisi Peter Majengo kuwa mshtakiwa Richard Msemwa 17 mkazi wa kijiji cha Luafyo juu katika kata ya Lugarawa alitenda kosa hilo juni 13 mwaka huu.

Majengo akaiambia mahakama ya hakimu mkazi kuwa mshtakiwa Richard Msemwa siku ya tukio aliwafuata watoto hao mtoni walipokwenda kuchota maji naye kuwavizia na kumkamata mtoto Jenifer Mwinuka na kumbaka vibaya.

Akisoma hukumu hiyo iliyochukua masaa takribani mawili hakimu mkazi Fredrick Lukuna wa mahakama ya wilaya ya Ludewa akasema mahakama yake imeridhika na ushahidi uliotolewa na upande wa mashtaka na kwamba hakuna shaka lolote kwamba mshtakiwa hakutenda kosa hilo.

Akasema ushahidi wa ripoti ya daktari pamoja na vielelezo vyote vilivyotolewa mahakamani hapo ndivyo vilimtia hatiani mshtakiwa huyo.

Akitoa amri Lukuna akasema kutokana na mshtakiwa kuwa na umri mdogo wa chini ya miaka kumi na saba mahakama inamtia hatiani na kwamba mshtakiwa anahukumiwa kuchapwa fimbo kumi na mbili matakoni lakini baada ya daktari kuthibitisha afya yake.

Akitoa maombolezo na utetezi kwa hakimu ili asipewe adhabu kali mshtakiwa Richard Msemwa aliomba apunguziwe adhabu kwa kuwa hakutenda kosa hilo Lakini mwendesha mashtaka akaitaka mahakama kutoa adhabu kali kwa mshtakiwa kwa kuzingatia uzito wa kosa ili liwe fundisho kwa watu wengine wenye tabia kama hizo ili kupunguza makosa kama hayo katika jamii, ingawa mwendesha mashtaka aliiambia mahakama kuwa ofisi yake haina kumbukumbu ya makosa ya nyuma kuhusu mshakiwa huyo.

                Mwisho.