SHIRIKA LA DARAJA LAFANYA UTAFITI WA HUDUMA ZA AFYA MIKOA YA NJOMBE NA IRINGA

UPATIKANAJI wa huduma za Afya hasa huduma ya mama na mtoto katika Zahanati ya kata ya Luana wilayani Ludewa limekuwa ni tatizo kubwa ambapo huwalazimu kutembea zaidi ya kilomita 10 kuifuata huduma hiyo Ludewa Mjini.

Hayo yalisemwa na Afisa mtendaji wa kijiji cha Luana Bw.Ladislaus Morani katika kikao kilichoandaliwa na shirika la Daraja kuhusiana na mpango wa shirika hilo katika kufanya tafiti ya huduma za afya zitolewazo vijijini.

Bw.Morani alisema wananchi wa kata Luana hasa akina mama wamekuwa wakipata shida katika huduma ya chanjo hivyo huwalazimu kutembea umbali mrefu kufuata huduma hiyo.

Alisema akina mama wazawazito wamekuwa wakisafirishwa na usafiri wa pikipiki (bodaboda)na wakati mwingine hujifungulia njiani hali hiyo ni hatari kwa akina mama hao kwani wanaweza kupoteza maisha yao au ya mtoto kutokana na Hospitari ya wilaya kutokuwa na gari ya wagonjwa inayoweza kutoa msaada wa haraka kwa wagonjwa

.

Bw.Morani alisema zahanati hiyo ambayo inamilikiwa na kanisa katoliki haina dawa kwa muda mrefu sasa hivyo kwa mgonjwa yeyote katika kata hiyo hutakiwa kununua dawa katika duka moja tu lililopo katika kata ya Luana. 

“wananchi wa kijiji chetu hasa akina mama wamekuwa na shida ya huduma ya chanjo ya wao wanapokuwa wajawazito na watoto wao hali inayowalazimu kusafiri hadi Ludewa mjini kufuata huduma hiyo,lakini hata dawa na usafiri hatuna na tukiwasiliana na hospitali ya wilaya tunaelezwa hakina gari”,alisema Bw.Morani.

Akizungumza katika kikao kilichowakutanisha wadau wa Afya katika zahanati nne wilayani Ludewa kaimu Mkurugenzi wa shirika Daraja lenye makao yake makuu mkoani Njombe Bw.Simon Mkina alisema shirika lake linafanya kazi ya kutoa msukumo kwa Viongozi na watendaji wa Serikali kutoa huduma stahiki katika jamii.

Bw.Mkina alisema mpango wao ni kukutana na wadau katika zahanati kumi na sita ndani ya mikoa miwili ikiwa ni kufanya utafiti  katika sekta ya Afya ili kubaini mambo mazuri na mapungufu ikiwa ni mojawapo ya kazi za shirika hilo katika kuhamasisha utendaji bora ndani ya Serikali.

Alisema kumekuwa na changamoto kubwa katika sekta ya afya hivyo tafiti inayofanya na shirika la Daraja inaweza kuibua mambo mengi hasa zahanati na vituo vya afya vilivyoko vijijini kutokana na maeneo mengi kusahaulika katika huduma hizo.

“tumeanza kufanya tafiti katika mikoa miwili ya kuanzia lakini matokeo yatakayopatikana katika mikoa hii tunaamini ni ya nchi nzima na baada ya hapo tutatoa taarifa katika Halmashauri husika ili wajirizishe na taarifa yetu na baada ya hapo taarifa hizo zitatolewa katika vyombo mbalimbali vya habari ili kuujulisha uma nini tunakifanya”,alisema Bw.Mkina.

Bw.Mkina alisema kupitia ufadhiri wa watu wa Marekani mpango huo utafanikiwa ikiwa kila mwananchi na mdau wa Afya ataeleza ukweli kuhusiana na huduma zitolewazo ambapo watahitaji kujua upatikanaji wa dawa,wafanyakazi wa sekta ya afya kama wanakidhi mahitaji,upatikanaji wa maji safi katika dhahanati,vyombo vya usafiri kwa wagonjwa na mapungufu katika nyumba za wafanyakazi na motisha zao.

Akifungua kikao hicho Mganga mkuu wa wilaya Ludewa Dakt.Hapines Ndossi alisema  wilaya yake inakabiliwa na changamoto nyingi ambazo utafiti huo utabaini,lakini changamoto kubwa anayokabiliana nayo ni upungufu wa wafanyakazi ambapo wamekuwa wakiacha kazi kutokana na mazingira ya kazi kuwa magumu.

Dr.Ndossi alisema wilaya ya Ludewa inazaidi ya vituo vya Afya 50 ambavyo vinachangamoto ya upungufu wa watumishi na nyumba za kuishi watumishi hali ambayo inawakatisha tama wananchi waliojitolea nguvu zao kuvijenga vituo hivyo.

Alisema Halmashauri ya wilaya inampango wa kutekeleza sera ya Serikali ambayo imelenga kujenga zahanati kwa kila kijiji ili kupunguza vifo vya akina mama wajawazito vinavyotokana na kusafiri umbali mferu kaajili ya kutafuta huduma ya Afya.

Aidha aliwataka viongozi wa shirika la Daraja kabla ya kuitendea kazi ripoti ya utafiti wanaoufanya ni vyema wakaipeleka kwa uongozi wa wilaya ndipo isambazwe maeneo mbalimbali ikiwemo vyombo vya habari.

Mwisho.