AFISA MTENDAJI ATIMULIWA OFISINI, OFISI YAFUNGWA MPAKA MKURUGENZI AFIKE.

   

WANANCHI wa kijiji cha kimelembe kata ya Mkomang’ombe wilayani Ludewa wamemtimua ofini afisa mtendaji wa kijiji hicho na kisha kuifunga milango ya ofisi hiyo hadi mkurugenzi wa halmashauri ya wilaya ya Ludewa atakapompeleka afisa mwingine wa kuchukua nafasi yake.

Zahama hiyo ya aibu ilimkuta Bw Ayubu Tematema ambaye alipewa dhamana na serikali ya kukiongoza kijiji cha Kimelembe kama afisa mtendaji lakini mambo yakawa magumu ambapo Novemba 18 mwaka huu wananchi walichukua sheria mkononi baada ya kuchoshwa na tabia za afisa huyo mvivu.

Akizungumza na mtandao huu mwenyekiti wa kijiji hicho Bw James Mtulo alisema kitendo walichokifanya wananchi wake wamekitenda kwa haki kutokana na mtendaji huyo kujaa kiburi na kujifanya mungu mtu.

Mwenyekiti akaorodhesha baadhi ya sababu na tabia mbaya zilizopelekea wananchi kufikia hatua hiyo kuwa ni pamoja na kutoitisha mikutano ya kusoma mapato na matumizi katika kijiji hicho.

Mengine ni ulevi, kiburi, kutafuna michango na uzembe kazini ikiwemo tabia ya kukaidi na kupuuza maelekezo mbalimbali ya maendeleo kutoka kwenye kamati tendaji ya serikali ya kijiji.

Aidha mtendaji huyo amekuwa akiitishwa vikao na kuingia mitini bila kuhudhuria vikao alivyoviitisha yeye mwenyewe jambo lililochangia kuongeza hasira kwa wananchi wa kijiji chake na kuamua kufunga ofisi yao.

Kipindi hiki kilipojaribu kumhoji afisa mtendaji huyo Bw Ayubu Tematema hakuwa tayari kukanusha wala kukubali badala yake aligeuka bubu na kukimbia camera na vinasa sauti vya waandishi wa habari.

Diwani wa kata ya mkomang’ombe Ananias Haule Kajole kwa upande wake alikiambia kipindi hiki kuwa yeye anaungana na wananchi katika kudumisha dhana ya uwajibikaji na kwamba mshahara wa mtumishi asiyewajibika siku hizi uko mikononi mwa wananchi wenyewe.

Mkurugenzi wa halmashauri ya wilaya ya Ludewa Fidelis Lumato alipoulizwa ni hatua gani za kinidhamu anastahili mtumishi huyo alisema ofisi yake bado haijapata taarifa hiyo na kwamba anafuatilia kwa maafisa wake kujua kulikoni na kasha atachukua hatua stahiki.