WALIMU WAILAUMU SERIKALI KWA KUSHINDWA KUWALIPA MADAI YAO

Imeelezwa kuwa Serikali ya Chama Cha Mapinduzi ipo hatarini kuanguka katika uchaguzi mkuu unaotarajiwa kufanyika Octoba 2015 kutokana na kuwanyanyasa waalimu kwa kutowapa stahiki zao ikiwa ni pamoja na madai ya fedha za likizo,nauli,kupandishwa madaraja na nyongeza za mishahara.

Kauli hiyo imetolewa  jana na mwenyekiti wa chama cha waalimu wilayani Rungwe,Elizabeth Sikila alipokuwa akizungumza na waandishi wa habari kuhusu Serikali kuwatelekeza kwa kutowapa stahiki zao mbali na kuwa amefikisha suala hilo kwa viongozi husika.

Sikila ambaye pia ni mwalimu wa shule ya msingi Madaraka iliyopo wilayani humo,alisema waalimu wanahali ngumu na wengi wao wamekata tamaa ya maisha kutokana na kufanya kazi katika mazingira magumu huku Serikali ikishindwa kutambua majukumu waliyo nayo.

Aliyataja madai hayo kuwa ni,Milion 26 za likizo na nauli kwa waalimu wa shule za sekondari ambapo walilipwa Milion 4 tu,na kuwa Milioni 46 za waalimu wa shule za msingi ambazo walikuwa wakizidai toka mwezi juni mwaka 2013 ambapo walilipwa milioni 20.1 tu kwa awamu mbili.

Mwenyekiti huyo alidai kuwa fedha hizo wanazodai zimetokana na nauli zalikizo,kuhamishwa vituo vya kazi  na fedha za madai mbalimbali pamoja na nyongeza za mishahara na kwamba waalimu walioongeza viwango vya elimu bado hawajapandishwa madaraja.

Aliongeza kuwa katika ziara ya katibu mkuu ccm Taifa Abrahamani Kinana alipozuru wilayani humo alitoa lalamiko hilo pamoja na kumkabidhi daftari la madai lakini bado madai hayo hayajapatiwa ufumbuzi hali inayowakatisha tamaa ya kujituma katika majukumu yao ya kikazi.

Alisema kwa hali hiyo Serikali ya Chama Cha Mapinduzi inajiweka katika mazingira ya kupata anguko kubwa katika uchaguzi mkuu na kwamba waalimu ndiyo chachu ya ushindi katika chaguzi zote na kama hawajamalizana na waalimu wasitegemee ushindi.

‘’Mimi ni mwanachama wa ccm lakini kwa mtindo huu sipo tayari kuendelea kukisapoti kwa kuwa mambo yote yafanywayo na Serikali yanatekeleza Sera ya chama hicho, hatupo tayari kuendelea kukisapoti chama hicho wakati Serikali yake inatutesa kwa kutotupa stahiki zetu,alisema mwenyekiti huyo.

Alisema wilaya ya Rungwe ina jumla ya shule 244 kati ya hizo shule za msingi ni 51 na vyuo viwili vya ualimu na kuwa katika vyuo hivyo Serikali imevitelekeza kabisa wakufunzi wanaishi maisha ya tabu baada ya serikali kutozitatua kero zao.

Aliongeza kuwa walipeleka kero zao kwenye ofisi ya mkuu wa wilaya pamoja na mkurugenzi lakini bado hawajapatiwa tiba ya namna ya kuondolewa kero zao  kutokana na serikali kutokuwa sikivu na wanaipeleka nchi pabaya kwa kuwatenga waalimu.

‘’haiwezekani watu wachache waharibu mabilioni ya nchi kwa kufanya ufisadi alafu wananshindwa kuwaadabisha na kuzirudisha fedha hizo ambazo zingeondoa kero za waalimu na kuongeza miradi ya maendeleo kwa wananchi.

Mkurugeza mtendaji wa halmashauri ya wilaya hiyo Veronika Kessy mbali na kukiri kuwepo kwa madai hayo ya waalimu alisema kuwa suala hilo ni janga la Taifa na kuwa walikwisha yapeleka madai yao kwenye wizara husika na yanafanyiwa kazi.