WASIOPATA VOCHA ZA RUZUKU YA PEMBEJEO WILAYANI LUDEWA WAAPA KUTOCHANGIA SHUGHURI ZA MAENDELEO.

                      

Mgogoro mkubwa umeibuka wilayani Ludewa kufuatia ugawaji wa pembejeo za Ruzuku ya kilimo kuto toshereza kwa wakulima tofauti na matarajio ya wakulima hao ambao wamelima mashamba makubwa na kukosa ruzuku hizo.

Akizungumza katika mkutano wa hazara Afisa mtendaji wa kata ya Ludewa mjini Bw.Onesmo Haule aliwaambia wananchi kuwa kata ya Ludewa Mjini zimeletwa vocha 650 zitakazo toshereza kaya 650 wakatika kata hiyo ina kaya 1752 hivyo wananchi wengine hawatapata ruzuku hiyo.

Hapo ndipo hasira ilipoibuka kwa wananchi na kuhoji nani atapata na nani hatapata ruzuku hiyo na kwa vigezo vipi na kuilaumu Serikali kwa kuwarubuni kwa sera ya kilimo kwanza wakati sera hiyo haitekelezeki.

Bw.Haule aliwasihi wananchi kutokuwa na jazba kwa tukio hilo na kuahidi kulifuatilia kwa karibu ili kuona kama utatuzi wa adha hiyo ya pembejeo za kilimo utawezekana kama wananchi wengi walivyo tarajia.

Aidha Afisa mtendaji huyo aliitupia lawama Serikali kwa kuwatumia mawakala kusambaza pembejeo hizo badala ya makampuni kama ilivyotarajiwa na wakulima walio wengi ambapo ingeweza kupunguza bei za pembejeo hizo.

Bw.Haule alisema Serikali ilipaswa kupeleka fedha za ruzuku hiyo viwandani na kuyakabidhi makampuni kusambaza kwa wakulima na si mawakala ambao wamekuwa ni tatizo kila mwaka hali ambayo hudhorotesha sekta ya kilimo nchini.

“Tumeshangazwa na mfumo huu ambao tumekuwa tukiupigia kelele  kila mwaka kwani hauna tija kwa wakulima zaidi ya kuwakandamiza wakulima wa hali ya chini kwa kuwaletea vocha chache ili kuuendeleza umaskini nchini zaidi ya kupunguza”,alisema Bw.Haule.

Akizungumza kwa niaba ya wakulima wengine Bw.Alen Msigwa alisema Serikali haina nia ya kuwainua wakulima zaidi ya kuwakandamiza na Sera ya kilimo kwanza haina tija kwa wakulima wa ndani labda wakulima wan je walioko nchini.

Bw.Msigwa alisema wananchi waliahidiwa kupewa pembejeo za ruzuku ikiwapo mbolea ya kupandia mazao na mbegu mapema kabla mvua kuanza kunyesha lakini suala hilo limekuwa kitendawili hasa wilayani Ludewa kwani mbegu na mbolea hizo zimefika wakati wananchi wameshapanda mazao.

Alisema vocha hizo hazitoshi na kunahatari kusababisha mgawanyiko wa wananchi kwani watakaopata vocha hizo ndio watakaochangia shughuri za maendeleo hivyo itawawia vigumu wenyeviti wa mitaa kukusanya michango ya maendeleo kwa wananchi wasiopata vocha.

“huku ni kusababisha matabaka miongoni mwa jamii kwani ni kazi ngumu kuwachagua wakulima kuwa nani apate na naniasipate kutokana na hali hii sasa tunaamini Serikali haina haja ya kutekeleza sera ya kilimo kwanza kwani dalili tunaziona na kama haiwezekani watoe taarifa na si kuwarubuni wananchi”,alisema Bw.Msigwa.

Kutokana na hali hiyo Afisa mtendaji wa kata Bw.Haule aliwataka wenyeviti wa mitaa kukaa na wananchi wa mitaa yao ili kupitisha majina ya watakaopata pembejeo hizo ingawa zimechelewa na hazitoshelezi kulingana na uwingi wa wakulima wa zao la mahindi wilayani Ludewa.

Bw.Haule aliusukumia mzigo huo kwa wenyeviti wa mitaa ambao kwa pamoja walisema wafanyakazi walioajiriwa katika ofisi yoyote hawatapata ruzuku hiyo wakiwemo wakulima wanaojiweza ili kupunguza mgogoro lakini waliosomwa kutopata waliapa kutotoa michango ya maendeleo.

MWISHO.