WANANCHI WILAYA YA LUDEWA WANUFAIKA NA MRADI WA TASAF KWA UFUGAJI WA NG'OMBE WA NYAMA

Wanakikundi cha ufugaji wa n g’ombe wa kijiji cha Kiyogo kata ya Masasi wilayani Ludewa wamenufaika na kikundi hicho baada ya kupata fedha katika mradi wa TASAF ambayo iliwanufaisha kwa kuwanunua Ng’ombe na kuwafuga.

Akizungumza na mtandao huu mwenyekiti wa kikundi hicho Bw.John Yahaya alisema mradi wa TASAF uliwapatia fedha shilingi million nane na laki tano ambazo ziliwawezesha kuwanunua Ng’ombe tisa na ujenzi wa banda la kuwafugia Ng’ombe hao.

Bw.Yahaya alisema kikundi chao kina wanachama kumi na tisa ambapo kuna wanaume saba na wanawake kumi na mbili ambapo hugawana ndama na mzunguko au mgao wa kwanza umeshakalika kwa kila mwanakikundi kupata ndama mmoja.

Alisema wakati wanauanza mradi huo kuna wengi waliwakatisha tama lakini kwa sasa kila mmoja wao ameweza kuona faida ya mradi hupo wenye miaka mingi na unaowanufaisha bila kujali jinsia ya mwanakikundi katika mgao wa ndama hao.

“Tumeanza kuona faida ingawa katika maeneo ya Afya,barabra,elimu na maji safi na salama Serikali yetu imetususa lakini kwa upande wa ufugaji ndio nguzo ya maisha yetu ya kila siku mpaka vijiji vya jirani wanauonea wivu mradi huo”,alisema bwana Yahaya.

Aidha katibu wa kikundi hicho Bw.John Likwava alilalamikia baadhi ya wanakikundi kushindwa kutimiza wajibu zao katika zamu za kuwachunga ng’ombe hao hali ambayo inapelekea ngo’mbe hao kuwa na Afya mbovu.

Bw.Likwava alisema utaratibu ulikuwa kila mwanakikundi hata kama ni mzee lazima apangiwe zamu ya kuwapeleka ng’ombe malishoni ambapo kila mmoja atafanya kazi hiyo kwa muda wa wiki moja lakini kuna watu ambao wanaonesha dalili mbaya.

Alisema kama wanakikundi watashiriki kikamilifu katika utunzaji huo wa mifugo basi kikundi chao kitapata mafanikio makubwa kwani wanampango wa kuwauza ng’ombe waliozeeka ili waanzishe mradi wa mashine ya kusaga nafaka.

Alisema kumekuwa na changamoto za hapa na pale katika kuwafuga ng’ombe hao ikiwemo ukosefu wa madawa ya kuwatibu ng’ombe hao na kuwaogeshea kutokana na umbali wa maduka ya dawa za mifugo na uchumi duni wa wanakikundi.

Bw.Yahaya alitoa sifa kubwa katika mradi wa TASAF kwa kuwakumbuka wananchi wa vijijini kushinda miradi mingine inayoendeshwa na Serikali kutokana na umbali wa kijiji na wataalamu wa TASAF waliolazimika kutembea kwa miguu zaidi ya kilomita 15 kufika kijijini hapo.

MWISHO.